Korporativ karta cheklari kompaniyangizga oyiga qancha turadi

Kompaniyaning eng qimmat xarajatlari hisobotda ko'rinmaydi. Ular alohida qatorda turmaydi, byudjetda nomi yo'q, oy oxirida hech kim ular haqida so'ramaydi. Shunga qaramay har oy to'lanadi.

Korporativ karta cheklari - aynan shunday xarajat. Quyida uni oxirigacha hisoblab chiqamiz.

Ko'rinmaydigan xarajatning xavfi shundaki, uni kamaytirish haqida hech kim qaror qabul qilmaydi - chunki uni hech kim ko'rmaydi.

Bugun bu jarayon qanday kechadi

Haydovchi yoqilg'i quyadi. Ta'minotchi mahsulot oladi. Xo'jalik bo'limi mayda-chuyda xarid qiladi. O'rtacha kompaniyada bu kuniga 30 ga yaqin chek degani.

Cheklar buxgalterga keladi - ba'zan bir kunlik, ba'zan bir haftalik to'plam bo'lib. Buxgalter alohida vaqt ajratadi va har bir chek uchun ikkita ishni bajaradi:

• chekni soliq tizimida ro'yxatdan o'tkazadi - QQSni zachyotga olish uchun
• keyin uni hisob tizimiga, aksariyat hollarda 1C ga kiritadi

Tajribali buxgalterda bitta chek o'rtacha 5 daqiqa oladi. Bu - chekda 1-2 ta tovar bo'lgan holat. Tovar ko'proq bo'lsa, vaqt ham shunga qarab ko'payadi.

Birinchi kalkulyator: vaqt

Hisob oddiy:

• 30 chek × 5 daqiqa = kuniga 150 daqiqa
• 150 daqiqa × 24 ish kuni = 3 600 daqiqa

Oyiga 60 soat. Faqat cheklarni terish uchun. Bu buxgalterlik ishi emas - bu ma'lumot ko'chirish.

Dobek AI bilan qanday bo'ladi

Jarayon chekni qo'lga olgan odamdan boshlanadi, buxgalterdan emas.

Karta egasi mobil ilovadan o'ziga ruxsat berilgan karta bo'yicha chekdagi QR kodni skanerlaydi, RRN ni kiritadi va tahlilga yuboradi. Keyingisi avtomat: chek soliq tizimidan ro'yxatdan o'tadi va 1C ga tayyor hujjat bo'lib tushadi.

Buxgalterning stoliga qog'oz kelmaydi. Uning ishi tekshirish va tasdiqlashdan iborat bo'lib qoladi.

Bugun bu tizim 20 ga yaqin kompaniyada ishlab turibdi. To'liq jarayon - skanerdan 1C dagi hujjatgacha - o'rtacha 20 soniya oladi.

• 30 chek × 20 soniya = kuniga 10 daqiqa
• 10 daqiqa × 24 kun = 240 daqiqa

Oyiga 4 soat.

Farq: oyiga 7 ish kuni

60 soat - 4 soat = 56 soat.

Sakkiz soatlik ish kuniga bo'lsak, oyiga 7 ish kuni chiqadi. Buxgalteringiz har oy bir yarim haftani qaytarib oladi. Va bu faqat bitta funksiyadan.

Endi buni so'mga o'giramiz

Vaqt rahbar uchun mavhum tushuncha. So'm - yo'q.

Buxgalter oyiga 8 mln so'm oladi va 24 kun ishlaydi deylik. O'z raqamingizni qo'ying - hisob tarkibi o'zgarmaydi.

• 8 000 000 ÷ 24 = kuniga 333 000 so'm
• 333 000 × 7 kun = 2,3 mln so'm

Ya'ni siz har oy 2,3 mln so'mni chek terishga to'laysiz. Buxgalterlik malakasi uchun emas - mexanik ish uchun. Yiliga bu 28 mln so'm.

Ikkinchi teshik: yo'qolgan QQS

Birinchi teshik hech bo'lmasa maoshda ko'rinadi. Ikkinchisi ancha jimroq.

Chek vaqtida soliq tizimidan ro'yxatdan o'tmasa yoki umuman yo'qolsa, QQS zachyotga tushmaydi. Bu pul qaytmaydi va uni hech kim qidirmaydi, chunki hisobotda yo'qotish degan qator yo'q.

Bizga ulanmasidan oldin mijozlarimiz shu sababdan oyiga o'rtacha 7-8 mln so'm yo'qotardi. Bugun bu yo'qotish 90 foizga kamaydi - oyiga 6 mln so'mgacha mablag' soliqdan qaytib kelmoqda.

Jami

• Mexanik ishga to'lanadigan maosh: 2,3 mln so'm
• Qaytarilgan QQS: 6 mln so'm

Oyiga 8,3 mln so'm. Yiliga 100 mln so'mga yaqin.

Buxgalterning oylik maoshi esa - 8 mln so'm.

Bitta funksiya bitta buxgalterning butun oylik maoshini qoplab, ustiga qo'shib qaytaradi.

Va bu tarifning to'rtdan biri

Yuqoridagi hisob faqat korporativ karta cheklari haqida edi. Tarif rejasida yana uchta funksiya bor va ularning har biri bugun ishlab turibdi:

• Bank tranzaksiyalari - ko'chirmani hisob tizimiga kiritish, mexanik ishni 20 barobar tezlashtiradi
• Chakana savdo cheklari - soliq tizimidan 1C ga avtomatik kiritish
• Fakturalar solishtiruvi - kiruvchi va chiquvchi fakturalar soliq bazasi va 1C dan olinib solishtiriladi, bosh hisobchiga tayyor hisobot bo'lib boradi

Ularning hisobini alohida maqolalarda ochamiz.

Raqamlar qayerdan olingan

• Kuniga 30 chek - mijozlarimiz bo'yicha o'rtacha ko'rsatkich
• Chekka 5 daqiqa - tajribali buxgalterning qo'lda ishlash vaqti, 1-2 tovarli chek uchun
• Chekka 20 soniya - 20 ga yaqin kompaniyada joriy tizimning real o'rtachasi, skanerdan 1C dagi hujjatgacha
• Oyiga 24 ish kuni - shanba yarim kun ishlaydigan kompaniyalar uchun o'rtacha
• Buxgalter maoshi 8 mln so'm - shartli qiymat, o'z raqamingiz bilan almashtiring
• QQS yo'qotish 7-8 mln so'm - bizning hisob-kitobimizcha, mijozlar ulanishidan oldingi holat bo'yicha

Raqamlaringiz boshqacha bo'lsa, formulani o'zgartirmasdan o'zingiznikini qo'ying. Xulosaning tuzilishi o'zgarmaydi.

Yakun

Bu maqolaning maqsadi - avtomatlashtirishni maqtash emas. Maqsad - hisobotda ko'rinmaydigan qatorni ko'rinadigan qilish.

Kalkulyatorni oching va o'z raqamlaringizni qo'ying. Chiqqan summa sizni qanoatlantirsa, hech narsani o'zgartirish shart emas.